rsm.mk

infantino

„Глобо Еспорте“ објавува дека ФИФА утре ќе потврди дека Светското првенство од 2026 ќе се зголеми на 48 репрезентации. Новиот претседател на ФИФА, Џани Инфантино сака да направи некои радикални промени и да остави белег на своето владеење. Глобо Еспорте“ пишува дека челниците на ФИФА веќе ја донеле одлуката и таа официјално треба да биде ратификувана и објавена во вторник. Изминатото Европско првенство за прв пат се играше со 24 репрезентации, реакциите за зголемувањето беа различни. Но голем дел од нив беа негативни, сметаа дека зголемувањето на квантитетот, влијае на намалување на квалитетот.

turski-parlament-turcija

Турскиот парламент денеска започна расправа за неколку уставни амандмани, со кои треба да се зајакне извршната власт на шефот на државата Реџеп Тајип Ердоган, како и да му се овозможи уште двапати да се кандидира за претседател. Според очекувањата, расправата во Парламентот би требало да трае околу две недели, а реформите мора да поминат два круга на гласање и да добијат поддршка од најмалку 330 пратеници во 550-члениот законодавен дом. Владејачката Партија за правда и развој има 14 гласови помалку од неопходните 330, но ја обезбедила поддршката од националистичката партија. Предложените измени треба да му овозможат на претседателот да биде главен носител на извршната власт, да именува влада, да предлага буџет и да прогласува вонредна состојба во државата. Со реформите би се зголемил и бројот на пратеничките места од 550 на 600, ќе се редуцира минималната возраст на пратениците од 25 на 18 години и ќе се утврди претседателските и парламентарните избори да се одржуваат во ист ден.

jaze

Тајландски функционери кои ќе бидат осудени за дела за корупција за над една милијарда бати (28 милиони долари) може да бидат осудени на смрт. Тоа го предлага Националната комисија за реформи. Од сите 162 члена на таа комисија, 155 гласале за таа мерка. Се предвидува државни функционери кои ќе бидат проглaсени за виновни за корупција за помалку од една милијарда бати да добијат затворска казна од најмалку пет години. Сега мерката треба да ја одобрат владата, парламентот и подоцна Уставна комисија.

avion

Кинеските власти извршија успешен тест на авион со електромотор кој користи водородно гориво. Се работи за заеднички проект на Кинеската академија на науки и Лијаониншкиот воздухопловен истражувачки институт. Тестирањето се одвивало во провинцијата Лијаонинг, што се наоѓа на североистокот од Кина. Леталото се кренало 320 метри над земјата и прикажало одлични перформанси и стабилна работа на сите елементи, дури и при минус 20 Целзиусови степени. При тестирањата, не е забележано никакво штетно празнење во атмосферата, се наведува во извештаите. Прототипот е изработен врз основа на кинескиот електричен авион RX1E, и е со моќност од 20 киловати. За време на полетувањето се користат и дополнителни акумулаторни батерии, кои потоа се гасат. Со овој проект, Кина стана трета светска сила, по САД и Германија, која поседува таква технологија.

133518258

Нов студен бран донесе врнежи од снег во многу делови на Грција, додека островите Алонисос и Скопелос останаа без врска со копното затоа што фериботите не пловат, а властите на Лезбос и Хиос се борат за ги згрижат стотиците мигранти кои се сместени во отворени кампови. Како што јави дописникот на МИА од Атина, во многу делови од Грција училиштата денеска не работат поради обилните снежни врнежи, а метеоролозите предупредуваат дека лошите временски услови ќе продолжат до среда. Се очекува од вечерва студениот бран да се прошири во североисточна Грција, Тракија, Халкидики, на северните егејски острови и Крит. Се предвидуваат и бури во морето. Во северозападниот дел на земјата се очекуваат температури и до минус 16 степени Целзиусови, а утрово во оваа област беа измерени минус 13 степени. Поради студениот бран, патувањето во многу делови од земјата е отежнато и на возачите им се препорачува да не тргнуваат на пат без зимска опрема, особено во северните области на Грција.

ozil

Плејмејкерот на Арсенал потврди дека ќе остане на „Емирати“ но само доколку во клубот остане Арсен Венгер. „Многу сум среќен во Арсенал и подготвен сум да потпишам нов договор. Сега се останува на клубот. Клубот знае исто така дека сакам да знам каква ќе биде ситуацијата со менаџерот во иднина“, изјави Озил. После ваквата изјава на германскиот репрезентативец, реагираше легендата на „Топчиите“, Тиери Анри кој што порача дека Германецот на овој начин го уценува клубот.

hilari-klinton

Хилари Клинтон никогаш повеќе нема да се кандидира ниту за една државна функција откако претрпи пораз од Доналд Трамп на претседателските избори во ноември минатата година, по кампањата која создаде досега најголеми поделби, изјави нејзината соработничка, Нира Танден. - Мислам дека таа ќе се занимава со помагање на деца и семејства, истакна Танден, која е претседателка на Центарот за американски напредок, поврзан со Демократската партија. Според неа, Хилари на овие прашања била фокусирана цел живот, па со тоа ќе се занимава и во следните години. - Но не очекувам дека таа некогаш ќе се кандидира за било која државна функција, додаде Танден, реагирајќи на шпекулациите на весникот „Њујорк тајмс“ дека Клинтон ќе се кандидира за градоначалник на Њујорк.

133346317

И додека во Бањалука се очекува почеток на свеченото одбележување на Денот на Република Српска, сараевски медиуми и меѓународни претставници инсистираат на тоа дека станува збор за неуставен празник. Од Амабсадата на САД во Сраево изјавија дека непочитувањето на одлуките на Уставниот суд на БиХ ќе значи и кршење на правото, а оние кои тоа го прават мора за тоа и да одговараат. Тие нагласуваат дека „овде не се работи за празници туку за владеење на правото“. САД поддржуваат постоење и статус на РС и Федерацијата БиХ во рамки на суверена Босна и Херцеговина, како што е гарантирано со Дејтонскиот мировен договор, е став на Одделот за односи со јавноста на Амбасадата на САД. Истакнуваат дека е „неодговорно да се ставаат вооружените сили на БиХ во средиште на таква расправа“. – Ги повикуваме сите страни да демонстрираат одговорно лидерство, да се возджат од заострена реторика и да почитуваат хиерархија за наредби во ОС на БиХ, наведуваат од Амбасадата. На прославата се поканети и српскиот претседател Томислав Николиќ и министри од владата на Србија. Сараевски медиуми јавија дека претседавачот со Претседателството на БиХ, Младен Иваниќ го злоупотребил Третиот пешадиски полк (Република Српска) на оружените сили на БиХ кои го построил вчера во Бањалука за време на положување цвеќе во рамки на одбележување, како што се наведува на неуставниот празник на Денот на РС.

struja3

Домаќинствата и помалите компании што се на регулираниот пазар за електрична енергија ги добиваат потребните количини енергија и ќе продолжат да ги добиваат соодветно на нивните потреби, порачуваат од АД ЕЛЕМ. Оттаму посочуваат дека во текот на вчерашниот ден целосно е одговорено на потребите на конзумот преку оптимизација на домашните производни капацитети, а поради екстремно ниските температури и зголемената потрошувачка која во текот на денот достигна и повеќе од 30 проценти од вообичаената за овој период од годината, дел од потребите се набавени од увоз преку јавна и транспарентна постапка. - АД ЕЛЕМ како одговорна компанија ги стави во погон сите расположливи капацитети, а дел од количините преку редовна постапка за набавка на електрична енергија ги обезбеди на слободниот пазар. Техничкиот зафат во термоелектраната „Битола 3“, на кој од саботата наутро интензивно работат стручни екипи на АД ЕЛЕМ и на РЕК Битола, поради тешките временски услови во кој се одвива, се очекува да заврши во текот на денешниот ден, а по завршувањето на техничко технолошките проби, најдоцна до раните утрински часови и да биде оперативен и вклучен во електроенергетскиот систем, велат од АД ЕЛЕМ. Стручните тимови на компанијата, додаваат, внимателно ја следат потрошувачката на електрична енергија и го прилагодуваат производството од домашните капацитети во согласност со потребите на тарифните потрошувачи. - Доколку анализите покажат дека е потребно надополнување на потребите преку набавка на електрична енергија, постапката ќе биде спроведена во согласност со сите правила и процедури донесени од Регулаторната комисија за енергетика. Како што информиравме во текот на вчерашниот ден, набавката на електрична енергија нема да влијае врз цената на електричната енергија за домаќинствата, потенцираат од АД ЕЛЕМ.

dini

Кинескиот тим Хебеј Чајна Форчун е подготвен да плати 25 милиони фунти за услугите на напаѓачот на Вотфорд, Трој Дини. Капитенот на „Стршлените“ оваа сезона за тимот на Валтер Мацари постигна само четири погодоци во 20 одиграни натпревари, а неговата моментална вредност на трансфер пазарот според специјализираниот сајт „Трансфермаркт“ изнесува 11 милиони фунти.

vlada-na-r.m

Претседателот Ѓорге Иванов денеска во 13 часот ќе го врачи мандатот за состав на влада на Република Македонија на Никола Груевски, претседател на политичката партија ВМРО-ДПМНЕ, соопшти Кабинетот на македонскиот претседател. Рокот кога претседателот Иванов треба да го довери мандатот за формирање влада на кандидат на партијата, односно партиите што освоија најголем број мандати на предвремените парламентарни избори одржани на 11 декември минатата година, истекува денеска. Деветтиот македонски парламентарен состав, кој има 120 народни избраници, се конституираше на 30 декември минатата година. Најмногу пратеници има коалицијата предводена од ВМРО-ДПМНЕ 51. Коалицијата предводена од СДСМ има 49 мандати, ДУИ 10, Беса - 5, Алијанса на Албанците - 3 и ДПА - 2. Во овој парламентарен состав нема народни избраници од дијаспората поради недоволен број освоени гласови. Мандаторот во рок од 20 дена од денот на доверувањето на мандатот, на Собранието му поднесува програма и го предлага составот на владата. Владата, на предлог на мандаторот и врз основа на програмата, ја избира Собранието со мнозинство гласови од вкупниот број пратеници. Претседателот Иванов викендов одговарајќи на новинарско прашање кога и на која партија ќе и го додели мандатот за формирање влада со оглед на тоа што тече рокот, рече дека ќе постапи како што е наведено во Уставот. Премиерот за спроведење на изборите Емил Димитриев, пак, на новинарско прашање за тоа дали очекува да биде запазен крајниот рок за доделување на мандатот, рече дека очекува целата процедура да биде во утврдените рокови согласно законите. ДУИ, Беса и Алијансата за Албанците, на 7 јануари ја објавија заедничката платформа која ќе биде нивна основа во преговорите за создавање на нова влада. Заедничката политичка агенда на трите партии предвидува целосна јазична еднаквост, односно употреба на албанскиот како официјален јазик, економска рамноправност, решавање на спорот за името со вклучување на Албанците во работната група за директни преговори со Грција, како и брза интеграција во НАТО и во Европската Унија

133518360

Во Германија има околу 43.000 граѓани поврзани со исламистичките групи, а од нив 11.000 се сметаат за лица со терористички тенденции, сметаат германските безбедносни служби. Според анализите на германските експерти, како што јави дописникот на МИА од Берлин, бројот на лицата кои се сметаат за радикални следбеници на исламот е во постојан пораст а особено е загрижувачка информацијата дека најголемо зголемување има кај ултра конзервативната група Салафисти. Околу 8.650 луѓе се сметаат за членови на оваа сунитска религиозна група која се залага за реформи во Исламот базирани на неговото конзервативно толкување. Од 11.000 исламисти, потенцијални терористи, 548 луѓе се сметаат за способни да спроведат терористички напади. Од нив половината се во Германија од кои 80 се вв притвор. Дополнително во земјата живеат уште 360 луѓе, кои би дале логистичка поддршка за политички или верски мотивиран криминал од поголеми размери. Досега над 800 радикални исламисти од Германија престојувале во конфликтните зони во Сирија и Ирак, каде се бореле во редовите на исламски терористички групи. Од нив во земјата се вратиле една третина, а 70 имаат борбено искуство. Претставници на германскиот синдикат на полициски работници во неколку наврати се пожали дека германските служби за безбедност немаат доволно ресурси за следење на сите потенцијално опасни граѓани за јавноата безбедност.

ujp1_620_350

Доколку граѓаните не извршиле плаќање на утврдените даночни обврски за персонален данок на доход за 2015 година и за претходни години по основ на Годишна даночна пријава или за 2016 година по основ на Аконтативна даночна пријава, тоа да го сторат во најкраток можен рок, порачуваат од Управата за јавни прииходи (УЈП) Оттаму прецизираат дека укажувањето се однесува и за самостојните вршители на дејност - занаетчии, земјоделци, трговци поединци, адвокати, нотари и други кои не извршиле плаќање на персоналниот данок на доход, без разлика дали станува збор за обврзник кој го плаќа данокот според реален или паушално утврден приход. - Граѓанинот може да изврши проверка на состојбата на долговите за персонален данок преку интернет користејќи ја услугата „е-Плаќање на персонален данок“. Регистрацијата за користење на оваа е-услуга е бесплатна за граѓаните. Единствено што ви е потребно е е-пошта и да креирате ваш кориснички профил на https://etax-fl.ujp.gov.mk/index_pregledPlakanje.jsp. За повеќе информации преземете го флаерот „е-Плаќање на персонален данок“ (кликни http://www.ujp.gov.mk/mk/publikacii/pogledni/60), порачуваат од УЈП. Доколку граѓанинот по различни основи има потреба да му биде издадено Решение за утврдување на персонален данок, може да поднесе Барање за препис (УЈП-ПР-З.2-16/1). Дополнителни информации може да се добијат преку Инфо центарот 0800 33 000.

vmro_dpmne_logo-24185-640x480

СДСМ со својата шпекулативна политика и манипулирањето со јавниот долг не направи ништо друго освен што ја зголеми каматата на еврообврзницата и ги чинеше македонските граѓани 30 милиони евра, реагираат денес од ВМРО-ДПМНЕ. Во продолжение следува интегрален текст од реакцијата на ВМРО-ДПМНЕ Тоа се 300 локални патишта, стотина градинки или 38 училишта, кои отидоа во ветер затоа што СДСМ не ги гледаше државните интереси, туку тераше партиска пропаганда со еврообврзницата. Единствено што СДСМ успеа да го направи пишувајќи писма до странските инвеститори за еврообврзницата е да ја зголеми цената на капиталот – каматата. Така народски кажано, поради политичка пропаганда на СДСМ – земавме помалку средства, но по повисока цена. Да потсетиме на изјавата на Заев дека ако во иднина дошле на власт и тие ќе се задолжувале, ама наменски. Заев наменски во ветер фрли 300 локални патишта, стотина градинки и 38 училишта, кога им пишуваше писма на меѓународните инвеститори повикувајќи ги да не инвестираат во еврообврзницата и со тоа ја качи нејзината цена. Намената беше единствено СДСМ политички да поентира. СДСМ десет години веќе зборува за грчко сценарио, кое никако да се реализира. СДСМ добро знае дека еден од изворите за покривање на буџетскиот дефицит предвиден за годинава е издавањето на државни хартии од вредност. Впрочем тие ги воведоа државните хартии од вредност кога беа на власт. Да го потсетиме СДСМ и дека во последниот извештај на ММФ за Македонија, функционирањето на пазарот на државни хартии од вредност доби пофалба од Фондот, и покрај опструкциите на тогашниот дополнителен заменик министер Наумов. Исто така, добивме оценка дека нивото на долгот е умерено. Со оглед дека СДСМ пропагира аранжман со Фондот, што инаку значи ново задолжување, зошто тогаш не го удостојат нивното мислење и признаат дека нивото на долг е умерено и дека пазарот на државни хартии од вредност одлично и соодветно функционира.

nikola-gruevski-int105-1_201491792125

Помеѓу албанските партии се креира заедничка платформа за настап. Се создава атмосфера овој пат да не коалираат со ВМРО-ДПМНЕ. -Да, повторно таа атмосфера како и во минатото и сега се создава од медиумите и лицата што водат или припаѓаат или се соработници на НВО финансирани од Институтот отворено општество. Вмешувањето на некои странски политичари и дипломати во приказната е дел од истата операција, водена од еден центар. Сепак, одлуката ќе биде наша, на ДУИ и на другите партии, и никој нема право да каже дека некој друг му сугерирал или му вршел притисок затоа што на крајот финалната одлука е наша. Многу албански политичари и аналитичари тврдат дека албанскиот електорат посакува влада водена од СДСМ со албанските партии? -Во 2008 година македонскиот електорат, особено вмровскиот, не сакаше коалиција на ВМРО-ДПМНЕ со ДУИ, па таа се случи најмногу затоа што Албанците во Македонија сакаа ДУИ да ги застапува во владата… Но овој пат и албанските медиуми се на ист став? -Да, исто како во 2008 кај македонските медиуми. Велат и членството на ДУИ не сака коалиција со ВМРО-ДПМНЕ? -Не знам дали така размислува членството на ДУИ, но знам како размислуваше членството на ВМРО-ДПМНЕ во 2008, па донекаде и во 2011 и 2014. Сепак, ВМРО-ДПМНЕ тогаш одлучи да коалира со ДУИ затоа што беше очигледно од изборите дека мнозинството граѓани Албанци сакаат ДУИ да е во владата. Но не беше така во 2006? -Во 2006 не можеше ни да биде поинаку бидејќи не само што воопшто не се познававме, туку с` уште беа свежи нашите спротивставености од времето на конфликтот во 2001 година, кога бевме на две спротивни завојувани страни. Сепак, и ние политичарите, но подоцна и нашите електорати најдовме сила да ги надминеме тие предизвици. Сепак, ДУИ сега може да донесе поинаква одлука? -ДУИ има право да донесе каква сака одлука. Исто како и ние. Сакате да кажете дека во иднина не би коалирале со нив ако сега донесат одлука да не одат во коалиција со ВМРО-ДПМНЕ како партија која доби најмногу гласови и пратеници? -Мислев генерално дека секој си носи одлука самиот, но ако сакате ќе одговорам и на ова прашање. Ако сега ДУИ отиде во коалиција со втората наместо со првата партија, со поразениот наместо со победникот, секако дека тоа ќе значи утврдување на една нова практика и традиција во Македонија, на која ние секако ќе се приспособиме, не само сега, туку и во иднина. Значи, ако сега ДУИ не коалира со ВМРО-ДПМНЕ како победник, на следните избори ако победите, нема да бидат дел од владината коалиција? -Ако ВМРО-ДПМНЕ како победничка партија биде изиграна од ДУИ, независно кои ќе бидат причините за тоа, бидете убедени дека наскоро ВМРО-ДПМНЕ ќе се врати на голема врата во владата и тоа најмалку два мандата по ред. И ќе бидеме без каква било обврска при составувањето на владата. Што ако СДСМ сега им понуди подобри услови за коалирање? -Поразениот обично нуди подобри услови. Поинаку не може ни да биде. Во 2008 и во 2014 и без ДУИ и без ниедна друга албанска партија ВМРО-ДПМНЕ можеше да формира влада. Прашањето е дали ќе постапуваме по принципите што до вчера ДУИ ги заговараше јавно или ќе ги смениме. Ние сме подготвени за двете варијанти. Но, не само на овие избори, туку и во иднина.

nikola-gruevski-glasanje-768x556

Но шест албански партии, односно три партии и една коалиција составена од три партии, излегоа со заедничка платформа? -И ние и во минатото, и сега и во иднина ќе бидеме речиси 25 партии во коалиција со заедничка платформа. Ако сакаме да ја играме играта со платформи, нема проблем, така ќе тераме отсега. Ахмети изјави дека за него најважни се интересите на Албанците и платформата на сите албански партии? -За мене најважни се интересите и на Македонците и на сите граѓани на Македонија, вклучувајќи ги и Албанците. Инаку, верувам дека се свесни дека во коалиција со СДСМ, платформата што им ја составуваа, политички може да му помогне најмногу на СДСМ кај албанскиот електорат. А зарем нема да им помогне на Албанците во Македонија? -На Албанците во Македонија нема да им помогне ако имаат двојазичност на цела територија, вклучувајќи ги и Делчево, Берово, Гевгелија или Кавадарци. Ним може да им помогне ако во наредните четири години се отворат уште 100 или 150 нови фабрики, и се вработат илјадници луѓе, ако стандардот почне да расте и имаат поубав и поквалитетен живот, ако пораснат пензиите, платите, субвенциите, социјалната помош, ако се изгради потребната инфраструктура, ако добијат поддршка за градба на куќи, ако се направат многу реформи и земјата се придвижи напред. Сепак, двојазичност на цела територија е нешто што е цел на ДУИ и албанските партии и можеби ќе направат с` што е во нивна моќ да ја остварат, макар и биле некој период во коалиција со СДСМ, па и по цена на помалку работни места за да го реализираат зацртаното. -Двојазичност на цела територија и кантонизација не може да биде реализирано ако ВМРО-ДПМНЕ е против. Како ќе го спречите тоа ако направат коалиција со СДСМ и сите албански партии? -Знаат во ДУИ како. Па, добро кажете ни и нам. -Ќе ме разберете дека некои наши планови не сакам да ги откријам.

132444126

Граѓаните да не излегуваат надвор без неопходна потреба, да конзумираат топли напитоци и храна што ја одржува температурата на телото, да избегнуваат алкохол и соодветно да се облекуваат, препорачува Комисијата за оперативно спроведување на активностите од Акцискиот план за заштита на здравјето на населението од студено време. Во случај на екстремно ниски температури за заштита на здравјето на населението, се препорачува избегнување физичка активност на отворено, користење топла, повеќеслојна облека и соодветни обувки за снег и мраз и внимателно одење. Се препорачува граѓаните што е можно повеќе да бидат активни и да се движат во затворени простории, да го проверат греењето во домот и доколку се во можност да помогнат на членовите на фамилијата, соседите или пријателите кои спаѓаат во ризичните групи на население. Ранливите групи на населени, како старите лица се препорачува да се облекуваат потопло, бебињата почесто да се проверуваат дали се загреани, срцево болните да избегнуваат тешки вежби и редовно да земаат лекарства, бидејќи се изложени на зголемен ризик за можни здравствени последици при студено време. Доколку граѓаните забележат лице од ризик од студено време како бездомник или деца на улица, истото да го пријават на бесплатниот телефон 15 505. Службите за медицина на труд имаат обврска да обезбедат соодветни информации на работодавачите и работниците кои работат во услови на ниска температура за постоечкиот ризик како и примена на соодветни мерки за справување со ризикот од ниски температури. За работодавците се препорачува да воспостават план на делување при работа во услови на студ и ниски температури, да се запознаат работниците со опасностите на кои се изложени при работа на отворено и со мерки кои треба да се превземат со цел за заштита на живот и здравје на работниците, во екстремно студени услови, да се обезбедат кратки прекини во работата во топли засолништа и да се организира работата во најтоплиот дел од денот и да се скратат периоди на работа надвор. На работниците им се препорачува да се запознаат со знаците и симптомите на заболувањата и повредите предизвикани од студ, да користат слоевита, комотна и топла облека за студено, влажно и ветровито време, со капи, соодветни обувки, ракавици и да консумираат поголеми количества топли, засладени напитоци и да избегнуваат пијалоци со кофеин и алкохол.

hrana

Трошоците на животот во декември лани се намалиле за 0,1 отсто, а цените на мало останале на исто ниво во однос на претходниот месец. Трошоците на животот и цените на мало, пак, во 2016 година бележат намалување од 0,2 отсто во споредба со претходната година. Според податоците на Државниот завод за статистика, во 2016 година намалување на трошоците на живот е забележано во групите: Храна и безалкохолни пијалаци и Здравје за 0,4 отсто, Алкохолни пијалаци, тутун и наркотици за 0,2 и Мебел, покуќнина и одржување на покуќнината за 0,1 отсто. Пораст има во групите: Рекреација и култура за 1,2 отсто, Транспорт за 0,5, Облека и обувки и Останати стоки и услуги за 0,2 и Ресторани и хотели за 0,1 процент. На ниво од претходната година се групите: Домување, вода, електрика, гас и други горива, Комуникации и Образование. Намалување на цените на мало има кај Земјоделски производи за 0,8 отсто, Услуги за 0,3 и Пијалаци за 0,2 отсто. Пораст е забележан кај Индустриско-непрехранбени производи за 0,3 отсто, групата Индустриски прехранбени производи е на ниво од претходната година. Трошоците на живот во декември лани во споредба со декември 2015 година забележа намалување од 0,2 отсто, а кај цените на мало има пораст од 0,1 отсто. Кај трошоците на животот во декември 2016 година во однос на претходниот месец има намалување од 0,1 отсто што е резултат на пониските цени на овошјето за 5,9 проценти, рибата и морските плодови и млекото за 0,8, другите прехранбени производи за 0,7, алкохолните пијалаци за 0,6, зеленчукот за 0,5, оризот за 0,4 и безалкохолните пијалаци за 0,2 отсто. Намалување е забележано и кај авионскиот превоз на патници за 6,5 отсто, средствата за чистење и одржување на станот за 0,4, услугите за рекреација и спорт за 0,3 и лековите за 0,2 отсто. Пораст има кај другите пекарски производи за 1,2 процента и шеќерот, џемот, медот, чоколадата и кондиторските производи за 0,6 проценти, како и кај туристичките пакет-аранжмани за 4,8 проценти, информатичката опрема за 2,7, течните горива за домаќинствата за 2,5, течните горива и мазива за 1,4, гасот за домаќинствата за 0,9, електричните апарати - мали за домаќинствата за 0,4, облеката, услугите и предметите за лична хигиена за 0,3 проценти.

anonimus

Групата „Анонимуси“ од Албанија и се закани на Франција дека ќе ја плати цената и ќе биде виновна за почеток на војна на Балканот, доколку не го ослободи Рамуш Харадинај. Во видео порака преку интернет каналот Јутјуб членови на „Анонимуси Албанија“ велат дека се многу разочарани од одлуката на француските власти во врска со апсењето на Харадинај, оценувајќи ја како провокација. - Вие го поткопувате дијалогот меѓу Косово и ЕУ. Вашата провокација ќе предизвика војна на Балканот. Затоа, не си играјте со нас. Не треба да го екстрадирате Харадинај на Белград, бидејќи по војната ќе биде со нас и Албанците. Не заборавајте, или Харадинај на слобода или ќе платите за ова. Ние сме „Анонимуси Албанија“. Ние не забораваме, чекајте не, се наведува во пораката.

500gorivo-nafta-benzin-dize

Бензините од ноќеска на полноќ поскапуваат за половина денар по литар, а цената на дизел горивата останува иста, одлучи денеска Регулаторната комисија за енергетика (РКЕ). Со одлуката се врши зголемување на рафинериските и на малопродажните цени во просек за 0,86, односно за 0,7 отсто. Новата малопродажна цена на ЕУРОСУПЕР БС-95 изнесува 67, а на ЕУРОСУПЕР БС-98 69 денари за литар. ЕУРОДИЗЕЛ (Д-Е V) и понатаму ќе чини 53,5, а екстра лесното масло за домаќинство (ЕЛ-1) 42 денари за литар. Со одлуката на РКЕ за 0,718 денари за килограм се зголемува и малопродажната цена на мазутот М-1 НС и ќе изнесува 28,827 денари за килограм. Како причина за зголемувањето на цената на нафтените деривати од РКЕ ги посочуваат за 1,6 отсто повисоката просечна цена на суровата нафта на светскиот пазар во изминатите 14 дена и за 0,33 отсто понискиот курс на доларот во однос на денарот.

ОФИЦИЈАЛНО: Светското првенство во 2026 година ќе биде со 48 репрезентации

Турскиот парламент расправа за зајакнување на извршната власт на Ердоган

Тајланд разгледува Смртна казна за корупција

Кина успешно тестираше авион со погон на водородно гориво

Снегот предизвика проблеми во Грција

Озил е подготвен да остане во Арсенал, но…

Хилари Клинтон не планира никогаш повеќе да се кандидира за државна функција

Во Бањалука најавено одбележување на Денот на РС

ЕЛЕМ: Тарифните потрошувачи и понатаму ќе ги добиваат потребните количини струја

Кинезите го напаѓаат Ватфорд

Иванов ќе му го врачи мандатот за состав на влада на Груевски

Расте бројот на радикални исламисти во Германија

УЈП: Во најкраток рок да се платат даночните обврски за персонален данок на доход

ВМРО-ДПМНE: СДСМ со својата шпекулативна политика ја зголеми каматата на еврообврзницата

Груевски: Во 2008 и во 2014 и без ДУИ и без ниедна друга албанска партија ВМРО-ДПМНЕ можеше да формира влада

Груевски: За мене најважни се интересите и на Македонците и на сите граѓани на Македонија, вклучувајќи ги и Албанците

Препораки за заштита на граѓаните од студено време

Намалени трошоците на животот

Албански „Анонимуси“ и се закануваат на Франција поради апсењето на Харадинај

Бензините поскапуваат за половина денар